ഇരിട്ടി: ആറളം ഫാം പുനരധിവാസ മേഖലയിൽ നിർമാണത്തിലിരിക്കുന്ന ആന മതിലിന്റെ കോൺക്രീറ്റ് പ്രവൃത്തിക്ക് തയാറാക്കിയ കമ്പികൾ ആന ചവിട്ടി നശിപ്പിച്ചു. പൂക്കുണ്ട് മേഖലയിലാണ് പില്ലറിന്റെ കോൺക്രീറ്റിംഗിന് കെട്ടി തയാറാക്കിയ കമ്പികൾ ചവിട്ടി നശിപ്പിച്ചത്. അഞ്ച് പില്ലറുകൾ ചവിട്ടി നശിപ്പിച്ചു.
മൊട്ടുകൊമ്പനാണ് നാശം വിതച്ചതെന്നാണ് പ്രദേശവാസികൾ പറയുന്നത്. ആന ചവിട്ടി വളച്ചതോടെ പില്ലറിന്റെ അടിത്തറ ഉൾപ്പെടെ പൊളിച്ചുമാറ്റി വളഞ്ഞ കമ്പികൾ നേരെയാക്കി വേണം വീണ്ടും നിർമാണം തുടരാൻ. ഇതോടെ ഇഴഞ്ഞുനീങ്ങുന്ന മതിൽ നിർമാണത്തിന് വീണ്ടും കാലതാമസം വരുമെന്ന ആശങ്കയിലാണ് പ്രദേശവാസികൾ. നിർമാണം വൈകിയാൽ കശുവണ്ടി, മാമ്പഴ സീസൺ ആരംഭിക്കുന്നതോടെ വീണ്ടും ആനക്കൂട്ടം ജനവാസമേഖലയിലെത്തും.